اے آر وائی نیوز کے مطابق وزیراعظم کی جانب سے دارلحکومت اسلام آباد میں پودا لگا کر2023 شجرکاری مہم کی شروعات کردی گئی ہے، انوارالحق کاکڑ کا اس موقع پر کہنا تھا کہ موسمیاتی تبدیلی سے نمٹنے کے لیے سیاست سے بالاتر ہو کر قومی جذبے سے کام کرنا ہوگا۔
نگران وزیراعظم نے کہا کہ موسمیاتی تبدیلی کے منفی اثرات سے محفوظ رہنے کے لیے موثر اقدامات ناگزیر ہیں، ماحول دشمن گیسوں کے عالمی اخراج میں پاکستان کا حصہ ایک فیصد سے بھی کم ہے۔ انوارالحق نے کہا کہ پاکستان موسمیاتی تبدیلی کے اثرات سے سب سے زیادہ متاثر ہوا ہے، آلودگی، ماحول کو متاثر کرنے والے دیگرعوامل سے منفی اثرات پیدا ہوتے ہیں، جس کا نتیجہ ہم کبھی سیلاب، کبھی زلزلہ یا کبھی دیگرقدرتی آفات کی صورت میں دیکھتے ہیں۔
انھوں نے کہا کہ سب کو موسمیاتی تبدیلی کے مسئلے کے حل کو اپنی ترجیح بنانا ہوگا، موسمیاتی تبدیلی کے منفی اثرات سے بچنے کے لیے عالمی برادری کو کردار ادا کرنا چاہیے۔ انوارالحق کاکڑ کو بریفنگ دیتے ہوئے بتایا گیا کہ مہم کے تحت ملک بھر میں مجموعی طور پر ایک کروڑ 10 لاکھ پودے لگائے جائیں گے، رواں سال بہار میں شجرکاری مہم کے تحت ملک بھرمیں 13 کروڑ 98 لاکھ پودے لگائے گئے۔