نیشنل کمانڈ اینڈ کنٹرول سینٹر نے ملک میں کورونا وائرس کے کیسز میں ایک دفعہ پھر اضافے پر تشویش کا اظہار کرتے ہوئے عیدالاضحیٰ کے دوران ایس او پیز پر خصوصی عمل درآمدکرنے کے لیے احکامات جاری کر دیے۔
این سی او سی نے عید الاضحیٰ کے حوالے سے جاری ایس او پیز پر عید کے دوران خصوصی عمل درآمد کے احکامات دیے۔ بیان میں کہا گیا کہ وہ پاکستانی جن کو ویکسین کی دونوں خوراکیں لگ چکی ہیں، ان کو کورونا ٹیسٹ مثبت آنے کی صورت میں 10 دن کے لیے لازمی قرنطینہ میں رکھا جائے گا۔این سی او سی کو بتایا گیا کہ جن افرادکو ویکسین نہیں لگی یا صرف ایک خوراک دی گئی ہے ان کو 10 دن کے لیے اپنے متعلقہ صوبے میں قرنطینہ میں رکھا جائے گا۔
بیان میں کہا گیا تھا کہ یہ خلاف ورزیاں ریسٹورنٹس، ان ڈور جم، شادی ہالز، ٹرانسپورٹ، مارکیٹس، سیاحت اور دیگر شعبوں میں دیکھی گئیں۔ این سی او سی نے سرکاری ملازمین کے ویکسین لگوانے کی حتمی تاریخ 30 جون مقرر کی تھی، 18 سال سے زائد عمر کے افراد کے لیے واک ان ویکسینیشن کی سہولت 11 جون سے شروع کی گئی تھی اور ویکسینیشن مراکز کے اوقات کار کو صبح 8 بجے سے رات 10 بجے تک کر دیا گیا تھا۔