ایڈمنسٹریٹر کے ایم سی اور سندھ حکومت کے ترجمان و مشیر قانون بیرسٹر مرتضیٰ وہاب نے کلفٹن دو تلوار اور کیماڑی میں 9 تعمیر شدہ سڑکوں کا افتتاح کردیا۔
مرتضیٰ وہاب کا کہنا تھا کہ یہ باتیں کرتے رہیں گے، سیاسی جماعتوں کا حق ہے کہ وہ الیکشن میں جانے نہ جانے کا فیصلہ کریں، ایم کیو ایم پاکستان کے ساتھ بلدیاتی نظام کی بہتری کے لیے بات چیت چل رہی ہے۔ انہوں نے کہا کہ پیپلزپارٹی ہمیشہ اپنے کارکنان کو یاد رکھتی ہے، کراچی سے تعلق رکھنے والے پیپلز پارٹی کے وقار مہدی کو سینیٹ کا ٹکٹ دیا ہے۔
بیرسٹر مرتضیٰ وہاب کا کہنا تھا کہ جو وسائل تھے اس کو دیانت کے ساتھ خرچ کیے، بلدیاتی ادارے اب کام کرتے ہوئے نظر آ رہے ہیں، کراچی میں ایک ہزار ملی میٹر بارش میں بلدیاتی اداروں نے کام کیا، کراچی میں 31 دسمبر تک تباہ حال سڑکوں کی تعمیر و مرمت کر رہے ہیں۔ شاہراہ ایران دو تلوار سے باغ ابن قاسم تک تعمیر کی گئی ہے۔ بارشوں کے بعد جو سڑکیں ٹوٹ پھوٹ گئی تھیں، انہیں درست کرلیا گیا ہے۔ ضلع جنوبی کے ساتھ ساتھ دیگر اضلاع میں بھی ترقیاتی کام جاری ہیں۔