ملک کے سب سے بڑے شہر کراچی کے علاقے بہادر آباد میں آج صبح فٹ پاتھ پر سویا شخص دیوار کے بلاکس گرنے سے ہلاک ہو گیا، جس کے بعد گزشتہ روز سے چلنے والے تیز ہوا کے جھکڑوں کے باعث پیش آنے والے مختلف حادثات کے نتیجے میں مرنے والوں کی تعداد 6 ہو گئی۔
اس سے قبل شہر میں چلنے والی گرد آلود تیز ہواؤں کے باعث دکانوں اور مکانات کی چھتیں، دیواریں اور بجلی کا پول گرنے سے ان کے نیچے دب کر 3 بچوں سمیت 5 افراد جاں بحق اور 3 زخمی ہو گئے، ہواؤں کے جھکڑ کے باعث درخت بھی اکھڑ گئے۔ اورنگی ٹاؤن سیکٹر 4 اقبال مارکیٹ کے علاقے راجہ تنویر کالونی عائشہ مسجد کے قریب دیوار گرنے سے 5 سالہ فرمان ولد شمس الرحمٰن زخمی ہو گیا جو عباسی شہید اسپتال میں دورانِ علاج چل بسا۔
سائٹ بی کے علاقے گلبائی پل کے قریب زیرِ تعمیر عمارت کی دیوار گرنے سے ملبے تلے دب کر مزدور جاں بحق ہو گیا، پولیس کے مطابق متوفی کی شناخت 55 سالہ فقیر حسین ولد منظور حسین کے نام سے ہوئی ہے۔
Similar News:آپ اس سے ملتی جلتی خبریں بھی پڑھ سکتے ہیں جو ہم نے دوسرے خبروں کے ذرائع سے جمع کی ہیں۔