استانبول/ خلیل سلحشور/ خبرگزاری آناتولی
امام علی‌رحمان، رئیس‌جمهور تاجیکستان امروز سه‌شنبه در دیدار با عبدالله عبدالله، رئيس شورای عالی مصالحه ملی افغانستان که به دوشنبه سفر کرده است، اظهار داشت: تاجیکستان دوست و متحد افغانستان است و از تلاش‌های صلح و تصمیم دولت و مردم این کشور در این عرصه حمایت می‌کند.
وی گفت: "افغانستان، تاجیکستان و منطقه از تروریسم، افراطگرایی و بی‌ثباتی متضرر شده‌اند. تامین صلح و ثبات در افغانستان زمینه گسترش و توسعه تجارت و ترانزیت میان دو کشور، منطقه و اتصال آسیای مرکزی به جنوب آسیا را فراهم می‌کند".
رحمان، افغانستان را از دوستان و متحدان نزدیک تاجیکستان خواند و تاکید کرد که روابط دو کشور ریشه در همسایگی، مشترکات تاریخی، فرهنگی و دینی دارد.
رئیس‌جمهور تاجیکستان با اعلام حمایت همه جانبه جمهوری تاجیکستان از تلاش‌های صلح در افغانستان، صلح و ثبات در افغانستان را صلح و ثبات در تاجیکستان، منطقه و فراتر از منطقه خواند.
وی ابراز امیدواری کرد که تلاش‌های صلح تحت رهبری شورای عالی مصالحه ملی در افغانستان به پیروزی برسد.
در همین راستا، عبدالله نیز گفت: روابط و دوستی میان دو کشور بر ارزش‌ها و مشترکات تاریخی، فرهنگی و دینی استوار است.
وی در ادامه تاکید کرد که دولت افغانستان در مذاکرات صلح به دست‌یافتن به صلح پایدار، عادلانه، باعزت و با حفظ ارزش‌های جمهوریت متعهد است.
رئيس شورای عالی مصالحه ملی افغانستان افزایش خشونت‌ها و جنگ را یکی از نگرانی‌های دولت و مردم کشورش عنوان کرد و بر پایان جنگ و خون‌ریزی در جریان مذاکرات تأکید کرد.
